Siç të gjithë e dimë, nuk është sekret që njerëzit shpërndajnë fjalëkalimet e llogarive të tyre në Netflix për familjarët dhe miqtë. Platforma e ka lejuar shpërndarjen e fjalëkalimeve, por mund të mos e lejojë më.
Netflix po planifikon që të mos lejojë shpërndarjen e fjalëkalimeve jashtë një familjeje të vetme. Personat që do të zgjedhin të japin fjalëkalimet jashtë familjes, do të tarifohen shtesë.
Në javët e ardhshme, platforma e transmetimit do të nisë të testojë veçori të reja, ku anëtarët do të duhet të paguajnë një shtesë prej 2 deri në 3 dollarë për të shpërndarë fjalëkalimet me njerëzit jashtë shtëpisë.
Njerëzit do të jenë në gjendje të shtojnë nën-llogari për deri në dy persona me të cilët nuk jetojnë, ku secili do të ketë profilin e tij, rekomandime të personalizuara dhe fjalëkalimin personal.
Tani për tani, testimi për shpërndarjen e fjalëkalimeve me pagesë do të bëhet vetëm për njerëzit në Kili, Kosta Rika dhe Peru. Nuk dihet nëse Netflix do ta miratojë planin në gjithë botën pasi të përfundojë testimi.
